Kalibo Aklan ———Arestado ro tatlong ka L300 van driver matapos nga maaktuhan sigon it mga pulis nga illegal nga nagasugae ukon nagahampang it billard sa atubang it sangka mabahoe nga mall sa bahin it F. Quimpo Street Extension, Brgy. Andagao, Kalibo.
Nakilaea ro mga suspek nga sanday Emillano Balajadia, 39-anyos, residente it Sampaguita Street, Brgy. Andagao, Kalibo; Carlo Palma, 38-anyos, residente it N. Roldan Street, Brgy. Poblacion, Kalibo ag Felipe Del Rosario, 59-anyos, residente it Brgy. Mobo sa nasambitang banwa.
Base sa imbestigasyon it Kalibo PNP, may nagtao sigon kanda it impormasyon ag insigida sandang nag-adto sa lugar kung sa siin andang naaktuhan ro tatlo nga nagahampang it billard.
Narecover sa lugar ro mga kwartang papel nga ginakaeakipan it sambilog nga 500 pesos, tatlong ka tig 100 pesos ag daywa nga tig 20 pesos kamana man ro an-om ka mga billard ball.
Ro mga nasambitang suspek hay sa paghinakop eon it Kalibo Police Station ag posibleng magpangatubang sa kasong pag-eabag sa Presidential Decree 1602.
