KALIBO, Aklan–Matapos ro haeos bilog nga gabi-i nga owa naka-uli, nakita eon ro tatlong menor de edad nga puro eaeaki nga nauna eon nga napabalita nga naduea.
Suno kay Jade Tumangday nga nagsaeampitan sanda nga magamasyar ag nagdesisyon nga magbaktas halin sa Barangay Tabayon paagto sa Barangay Pook Kalibo agud nga magpaligos sa baybay.
Naduea eon sigon sa andang isip nga mag-ea-ong sa andang natungdan nga mga ginikanan.
Apang ginrason it sambilog nga indi sanda pagsugtan kon mag-ea-ong.
Ginsaysay nanda nga haeos ap-at nga oras sanda nga nagbinaktas ag nagapahuway man kon makakita it waiting shed.
Ro mga unga hay ginsapopo ni certain nanay Ineng Dela Rosa.
Nauna kara, nagkabaeaka ro mga ginikanan it mga unga nga naga-edad it 10 ag 11 anyos matapos nga owa sanda nakauli umpisa pa kahapon it mga bandang alas-2 it hapon hasta makarun nga adlaw it martes, petsa 28 it Disyembre.
Suno kay Mr. Glenbert Menggani , residente it Barangay Tabayon, Banga, ama it sambilog sa mga naduea nga unga nga ulihi nandang nakaibahan ro andang unga nga si Christian bandang alas-2 sa hapon samtang nagahinampang it linagsanan kaibahan ro daywa pang mga unga nga sanday Jade Tumangday ag si certain Ermark.
Apang nakibot eamang sigon sanda kat gulpi nga naduea ro mga raya ag owa man it may makasugid kung siin nag-adto ro mga raya.
Samtang, may nakasugid man nga ulihi nga nakita ro tatlo nga nagbakae it face mask.
Sa pihak nga parte, ginpahayag man ni Jenavel Tumangday , ina it naduea man nga unga nga si Dave Tumangday nga owa nanda ginhambaean it maeain nga tinaga ukon ginsakit ro andang mga unga antes pa man rayang nagpanaw.
Dugang pa kara nga may nakasugid kanda nga ulihing nakit-an ro tatlo nga magkaibahan sa may bahin it Manggan Elementary School sa banwa man it Banga.
Nagapati man raya nga posibleng nag-adto sa Jetty Port sa Barangay Pook, Kalibo ro tatlo.
