KALIBO, Aklan—Posibleng magapangatubang sa kasong pag-eabag sa Republic Act 11332 ukon mandatory Reporting of Notifiable Diseases and Health Events of Public Health Concern Act ag Falsification of documents ro tatlo eon man ka mga indibidwal matapos nga makumpiskahan it pekeng Reverse Transcription-Polymerase Chain Reaction (RT-PCR) test result agud nga makasueod sa isla it Boracay.
Suno kay PSSgt. Teddy Dalisay it Malay PNP, ginkumpirma sigon mismo it St. Luke’s Medical Center nga uwa it record kanda nga nagpa swab test ro tatlong turista.
Base imbestigasyon it pulisya, nakasueod ro tatlo sa Boracay ko January 24, 2021 nga may booking accomodation sa sangka hotel.
Maga-check out eon kunta sanda kahapon Enero 28 apang nadiskubrehan nga peke ro andang ginpakitang swab test result rason nga insigida sandang ginbueo sa hotel nga temporaryong gin-okupa ag gindaea sa Aklan training center para sa isolation process.
Una kara, si Caticlan Jetty Port Administrator ag Provincial Administrator Atty. Selwyn Ibarreta mismo ro nagtawag sa Malay PNP para ipasayod nga may tatlong turistang nagagamit it pekeng RT-PCR test result nga nakasueod sa Boracay.
Ro insidente hay padayon pang ginaimbestigahan it pulisya ag palaisipan pa hasta sa makaron sa mga awtoridad kon sin-o ro sa likod it pag-produce it mga pekeng swab test result.
