KALIBO, Aklan—Tuga it epekto it coronavirus disease ukon COVID 19, kanselado man ro ginapatigayon nga tax campaign it Bureau of Internal Revenue ukon BIR-Aklan district.
Raya hay bilang pagsunod man sa ginpaguwa nga Executive Order No. 18 ni Gov. Florencio Miraflores nga nagabawae anay it mabahuean nga pagtililipon.
Suno kay Marilyn M. Tardaguela, Assistant Revenue District Officer nga ro pang-ulihi kunta nanda nga tax campaign hay pagahiwaton sa banwa it Kalibo bilang kaparte it andang tax consciousness month makaron nga buean it Marso.
Sa pihak kara, ginpahayag dugang ni Tardaguela nga naabot it BIR-Aklan ro andang target collection ko buean it Enero ag Pebrero.
Ginaeauman eon sigon nanda nga maganaba ro andang koleksyon makaron nga Marso bangud sa epekto it COVID-19 sa industriya it turismo eabi eon sa isla it Boracay ag banwa it Kalibo.
Nasayuran nga ko 2019, ro Aklan hay nagpang-lima sa tax collection sa 130 nga distrito sa bilog nga Pilipinas ag nagpabilin raya nga billionaire province sa natipon nga haeos P1.999 billion ukon nagtaas it kapin sa 14.25% ukon masobra sa P250 million kumpara ko 2018.
Gin-abisuhan man it BIR ro mga establisimento nga nagsarado nga magdangop sa andang taeatapan.
Samtang, antes nga makasueod sa BIR office, obligado ro andang mga kliyente nga maggamit anay it sanitizer ukon alcohol ag ro mga maeain ro pamatyag hay kinahangean nga magsuksok it face mask nga iga-provide it taeatapan kon owa sanda it daea.
Nakataeana man sigon sanda nga magabakae it handheld nga thermal scanner sa pagtan-aw sa body temperature it sangka indibidwal.
