KALIBO, AKLAN — Ginsuhestyon ni Bayan Muna Rep. Carlos Isagani Zarate nga ipasa anay ro adjustment sa income tax antes pagadebatehan kon kinahang-ean pang magpatuman it panibag-ong buwis sa idaeom it Tax Reform Bill it Kamara.
Sa interview it Bombo Radyo, ginpahayag ni Zarate nga inde imaw magboto sa House Bill 5636 ukon Tax Reform for Acceleration and Inclusion bangud kapin eamang raya nga magapakalisod sa mga pobre nga kabaliskaran sa anang ginaduso.
Nag-atras sigon imaw bilang co-author it house bill bangud sa pilang mga probisyon sa consolidated version it tax reform kaparehas it imposition it 12 percent nga value-added tax (VAT) sa mga naga-ukopa it baeay nga nagabalor it P10,000 panaba.
Inde man sigon makapanipueos ro mga ordinaryong pumueoyo sa adjustment it income tax bangud ro minimum wage earners hay excempted eon sa income tax.
Sa baylo sigon nga iduso ro mas mataas nga excise tax hay tutukan it Department of Finance ro pagpabaskog it andang koleksyon sa mga uwa nakolektang buwis kada dag-on it Bureau of Internal Revenue (BIR) ag Bureau of Customs.
