KALIBO, Aklan—Ginsaysay it sangka padre de pamilya nga agud nga magastusan ro gusto nga kurso it mga unga hay napilitan imaw nga magbaylo it career halin sa pagiging teacher paagto sa sangka seafarer .
Raya ro ginpahayag ni ship captain Allan Ismael, ama it bag-ong pasar nga si Dr. Liean Jemimah Ismael .
Suno kana nga maskin nga stable eon kato ro anang trabaho bilang sangka ordinary nga teacher, uman imaw nga nag-eskwela agud nga maging marino hasta nga naging madinaeag-eon makaron nga kapitan it barko .
Nasayuran sigon nana nga indi maabot it anang mga unga ro andang handum sa kabuhi kon bukon it bastante ro anang ginakita.
Eubus sigon ro anang kalipay bangud nga nabayluhan it kadaeag-an ro pag-antus it anang unga sa pagtuon matapos nga makapasa raya sa Physician Licensure Examination ko Setyembre.
Unga pa eamang sigon si Dr. Liean hay nagtubo eon sa anang isip nga maging sangka doktor matapos nga maging inspirasyon ro sangka doktora sa sangka clinic nga anang nakita nga nagatatap it anang pasyente.
Bilang ginikanan, laygay ni ship captain Ismael nga suportahan ro anuman nga handum it mga unga, apang indi sanda pagdiktahan kon ano nga kurso ro dapat nga pagaboe-on agud nga indi mabasuean .
Mabahoe man sigon nga bagay ro pirme nga nagapangamuyo.
Nauna eon nga ginpahayag ni Dr. Liean sa ginpatigayon nga interview kana it bombo kalibo nga naging mabahoe nga parte sa paghubog it anang pagkatawo ro anang mga ginikanan eabi eon ro anang ama nga ginhimo ro tanan nga masarangan agud nga maangkon ro anang handum nga maging eubus nga doktor.
