KALIBO, Aklan—Nagapabilin nga kulelat sa mga medalya ro team Aklan sa patag it athletics sa nagapadayun nga Western Visayas Regional Athletics Association ukon WVRAA meet 2023.
Raya hay bangud nga ro pinakamataas pa eamang nga naangkon it aklan hay ro silver medal pinaagi sa sangka grade 11 student nga si Michael Gabriel Lozada sa 5,000 meter dash.
Ginpaathag ni Mr. Jovie Ote, athletics manager it team Aklan nga nag back to zero sanda makaron nga edition it WVRAA bangud nga kaeabanan sa andang mga medalists nga atleta hay puro nag-graduate eon ag ro andang ginpang training hay mga newly breed ukon mga bagito pa sa pagsabak sa kompetisyon.
Aminado sanda nga masyadong nabudlayan ro mga atleta nga makabo-oe it medalya eabi eon ro bueawan.
Gindugang pa ni coach Ote nga ro ginapasaeamatan eon lang nanda makaron hay ro pag angkon it experience it mga bag-ong atleta nga makapahaum para sa masunod nga WVRAA meet.
Ginpahayag dugang nga bangud sa pandemic hay nawad-an sanda it kahigayunan nga maka-scout it mga bag-ong player kasunod it temporaryong pagkaduea it andang grassroots program.
Mag-eowas pa nga owa it mga ginpatigayon nga sporting events ag sumabak eagi sa WVRAA.
Target nanda nga makabawi sa masunod nga dag-on.
Nasayuran nga ro powerhouse team it Iloilo ag Negros ro nagapangibabaw sa athletics event.
