KALIBO, Aklan—Nakalista ro Commission on Population (POPCOM)-Aklan it pagnaba sa numero it teenage pregnancy sa tyempo it pandemya.
Suno kay Paul Adrian Pelayo, Gender and Development Officer it POPCOM-Aklan nga eain raya sa andang ginaeauman bangud mas maabo eon ro oras it magkarelasyon sa sueod it baeay tuga it mga ginapatuman nga restriction.
Raya sigon ro kauna-unahan nga kahigayunan nga owa nag-eampas sa sang libo ro numero it mga pamatan-on nga nagnabdos halin ko dag-on 2010.
Base sa datus, nakalista eamang ro taeatapan it kapin sa 686 nga teenage pregnancy ko nagtaliwan nga dag-on.
Dugang pa ni Pelayo nga 10 porsyento eamang it kabilugan deliveries it mga nag-unga ro sakop it teenage pregnancy.
Dugang pa kara nga halin 2015 amat-amat eon nga nagnaba ro numero it mga pamatan-on nga nagnabdos.
Pamatuod eamang sigon raya nga naging epektibo ro kampanya it gobyerno sa pagpaabot it nagakaigo nga impormasyon sa mga pamatan-on pag-abot sa pagpamilya ukon pagnabdos.
Mag-eowas kara, posibleng nakaapekto man ro pagbawae sa mga naga-edad 18 panaba nga magguwa it andang panimaeay rason nga nalimitahan sro sexual activity it mga adolescent.
Sa pihak nga parte, nakaangkon man it pagtaas sa numero it mental health issue it mga pumueoyo kaibahan ro pamatan-on.
Ginpahayag ni Pelayo nga nagtaas ro kaso it depression ag attempted suicide sa probinsya it Aklan umpisa nga magtuhaw ro pandemya.
Sambilog sa mga ginapanan-aw nanda nga rason hay ro kakueangan it social interaction it mga inunga tuga it paghugut.
Aminado si Pelaydo nga mabudlay ma-track ro mental health issue eabi eon kun bukon it bukas nga makipag-istorya ro sangka indibidwal nga naka-experiensya kara.
Ginlaygayan man kara ro publiko nga maging mapagmatyag agud nga mabuligan ro mga tawong may ginabatyag nga depresyon.
