BALITA Espesyal–Sangka ginang sa China ro nakibot kat makit-ang naubos it anang onga ro 450,000 yuan ukon katumbas it P3.5 million nga sueod it anang bank account bangud sa mobile games!
Nadiskubrehan ni Gong Yiwang ro pagkaubos it andang kwarta matapos imaw nga tawagan it sambilog sa mga manugturo it anang onga sa boarding school.
Tumawag raya nga may pagkabaeaka ag may pagduda nga nalulong eon sa paghampang it mobile games ro 13-anyos nga dalagita.
Para kumpirmahon ro pagduda it manugturo, gintan-aw ni Yiwang ro anang bank account ag nakibot raya nga pitong sentimo eon lang ro sueod kara.
Nasayuran ni Yiwang nga halin Enero hasta Mayo 2023, ginamit it andang onga ro andang debit card sa mobile games.
Nagaabot sa haegang 120,000 yuan ro ginastos kara sa pagbakae it game accounts ag 215 yuan man sa mga in-game purchases.
Nasayuran nga nakaangkon it access ro dalagita sa bank account it anang ina matapos iregister kara ro debit card sa anang smartphone.
Ro sambilog pa sa rason it pagkaubos it kwarta hay nagpa-money transfer ro 10 sa mga kaklase it dalagita.
Nasayuran it mga raya nga hilway nga nakakapagwaldas ro dalagita gamit ro debit card rason nga ginbully nanda raya nga padaehan sanda it kwarta.
