KALIBO, Aklan—Temporaryong ginsaraduhan ro taeatapan it Office of the Municipal Mayor, Municipal Planning and Development Office ag Human Resource Management Office it munisipyo it Kalibo umpisa Biyernes nga adlaw matapos magpositibo sa COVID-19 ro pilang empleyado kara.
Suno kay Kalibo Mayor Emerson Lachica nga ro nasambit nga mga opisina hay sarado anay ag igapahiyod eon lang kon hin-uno raya uman nga magabukas.
Tuyo kara nga mataw-an it daean ro paglimpyo ag disinfection ag matapna ro mas pang pagkalhit it deadly virus.
Sa pihak kara, ginpahayag ni Mayor Lachica nga padayun sanda nga magabaton it importanteng mga transaksyons nga nagakinahangean it insigidang aksyon ag atensyon agud nga indi maapektuhan ro importanteng operasyon.
Gindugang pa kara nga ro iba pang apektadong opisina hay magapatigayon it work-from-home arrangement ag tele ukon video conferencing.
