KALIBO, Aklan—Importante ro tempranong pagpa-eksamin agud nga malikawan ro colon cancer.
Ro colon cancer hay sangka klase it sakit sa large intestine ukon colon, ro sa idaeum nga bahin it sistemang pangtunaw.
Samtang ro rectal cancer man hay kung ro kanser hay makit-an sa ulihing ap-at nga pulgada it bituka.
Ro raya nga sakit hay masami man nga ginatawag nga colorectal cancer.
Suno kay Dr. Omar John Mejia, Fello it Philippine College of Physician nga masami nga nagahalin ro kanser sa tinae bilang maisot, bukon it cancerous nga bukoe nga ginatawag nga adenomatous polyps.
Pagakataliwan it tiyempo hay ro iba sa mga polyp hay nagiging colon cancer.
Ro polyp hay puweding maisot ag nagapaguwa it maisot nga mga sintomas, kung may una man.
Ro may mabahoe nga risgo sa nasambitan nga sakit hay ro mga may edad eun.
Kaabuan sa mga tawong may colon cancer hay naga-edad it 50 pataas.
Apang puwedi sa gihapon kara nga makaangkon ro mga una sa batang edad.
Bangud kara hay ginarekomenda it mga doktor ro regular nga pagpatan-aw agud malikawan ro kanser sa bituka pamaagi sa pagkilaea ag pagkakas sa polyp antes paman raya maging kanser sa bituka.
