Ginakabig it House prosecution bilang “appetizer” pa eamang ro naging testimonya it daywang Landbank bank manager nga nag-atubag bilang testigo it prosecution team sa pagpamatuod it Article 1 ukon confidential funds.
Suno sa prosekusyon, may una pa nga igapaguwa nga mga testigo nga magapabakod nga nagkasaea si Vice President Sara Duterte it betrayal of public trust ag culpable violation of the Constitution daea it saea nga paggamit it P612.5 milyong confidential funds.
Sa pagpamati, ginkumpirma ni retired LandBank Shaw Boulevard Branch Manager Violeta Constantino ro pagpa-encash it ap-at nga tseke halin sa Office of the Vice President nga umabot sa P500 milyon. Samtang, tumestigo man si dating LandBank DepEd Branch Manager Nenita Camposano angot sa tatlong tseke it Department of Education nga nagabalor it P112.5 milyon.
Suno sa daywang testigo, bukon it ordinaryo ro nasambit nga mga transaksyon bangud sa mga mabahoe nga kantidad nga ginapa-encash.
Para sa prosecution, importante man ro pattern sa mga transaksyon, kaibahan ro magkaparehong kantidad it mga tseke, tempranong koordinasyon sa banko ag pagpa-encash nga ginapatigayon kada quarter.
Ginpamilit ni House Senior Deputy Majority Leader ag Iloilo Rep. Lorenz Defensor nga umpisa pa eamang ro testimonya it daywang bank managers ag may una pang mga testigong igapa-atubang ro prosecution agud nga pamatud-an ro alegasyon nga betrayal of public trust ag culpable violation of the Constitution kontra kay Duterte.
Samtang, ginpahayag ni House trial spokesperson Zia Alonto Adiong nga tumaeagsahon ro nasambit nga mga transaksyon bangud nga direktang ginpa-encash ro pondo sa baylo nga ideposito sa regular nga account it mga ahensya.
