KALIBO, Aklan—Palaisipan makaron sa minilyon nga mga residente it Texas, USA ro haeos limang adlaw eon nga winter storm nga nagtuga it sobra kaeamig nga paniempo nga naga-abot sa negative 15 degrees celcius , rolling blackouts ag kakueangan it tubi nga nagatubod sa mga gripo sa bilog nga estado.
Suno kay Bombo International Correspondent Pinoy Gonzales nga makabig nga abnormal ro nasambit nga temperatura bangud nga kaeabanan nga nagabuhay eamang it sang adlaw hasta daywang adlaw ro pagtama it snow storm.
Ro dating mainit nga paniempo sigon sa Texas hay mas maeamig pa makaron sa Alaska.
Ro nasambit nga insidente suno kay Gonzales hay ulihing naexperiensiyahan may 115 anyos eon ro nagtaliwan.
Ro dating naga-produce suno kana it kuryente sa kaabuan nga lugar sa amerika hay owa makaron it kaugalingon nga power supply matapos nga napuno it snow ro andang power generators ag mga tubo it andang natural gas.
Mag-eowas kara, nagtaas man ro demand it mga tawo sa kuryente sa sigidas nga pagpaandar it andang mga heater.
Bangud kara, pilang mga establisimento suno kana ro nagapabilin nga sarado.
Maabu man nga mga nailistang aksidente bangud sa madanlog nga karsadahon.
Kon owa suno kana it supply it kuryente hay nagagamit sanda it fire place.
Sa pihak nga parte, ginpahayag ni Gonzales nga sa biyernes ukon sabado hay ginapanan-aw base sa andang weather forecast nga magabalik eon man ro mainit nga tiempo sa Texas kapareho it temperatura sa Pilipinas.
Nagakabaeaka suno kana ro mga residente nga posibleng magtuga raya it pagmasakit it mga tawo.
