Nagapabilin nga eapnaag sa gihapon ro text scams sa nasyon sa paihak it ginreport nga pagpanaba it Department of Infromation and Communications Technology (DICT).
Madumduman nga ko Enero, ginpahayag it DICT nga nabuhinan eon ro text scams kasunod it pagpatuman it SIM registration law.
Suno kay Senator Grace Poe nga principal author it SIM registration law nga nagapabilin sa gihapon ro ginatawag nga SIM farms ag spoofing tools ag indi sigon magpundo ro mga scammers sa paghimu it pamaagi para magpanakaw it impormasyon ag magpangloko it mga indibidwal.
Gin-engganyo man it Senadora ro DICT ag ro mga telecommunications companies nga punggan ro tanan nga naga baeabag sa pagpalista it mga SIM registrant antes ro deadline sa Abril.
Base sa latest data maghalin sa DICT, kapin sa 45.8 million users eon ro nakapagparehistro it andang SIM cards nga katumbas it 27.12% it kabilugang 169 million SIM active subscriber sa bilog nga nasyon.
