KALIBO, Aklan—Insigidang nagpaabot it anang simpatiya si Thai Prime Minister Prayuth Chan-ocha kasunod it mass shooting nga nag-eontad sa siyudad it Nakhon Ratchasima sa Thailand nga ginkamatay it 29 katawo ag 57 iba pang naninahan.
Raya hay suno kay Bombo International Correspondent Samuel Renton, tubong Banga, Aklan apang presenteng nagatrabaho sa Bangkok, Thailand.
Suno kana, napatay man it mga pulis ro suspek nga si Jakrapanth Thomma, 32-anyos, pilang oras matapos ro pumalpak nga raid sa Terminal 21 mall sa nasambitang syudad.
Ginpahayag dugang nga una eon sa eowas sa kahimtangan ro an-om ka mga overseas Filipino workers (OFWs) nga na-trap sa sueod it mall kat matabo ro insidente.
Madumduman nga nag-umpisa ro insidente bandang alas-3:00 it hapon, adlaw it Sabado kat nagpamaril si Jakrapanth sa sangka baeay antes nga nagpadueong sa military base ag sa nasambitang mall.
Ginpahayag ni Prayuth nga ro pagkadismaya ni Jakraphanth matapos sigon raya nga maloko sa sangka property deal ro motibo sa pang-atake.
