KALIBO, Aklan—Hugut nga quarantine protocols ro ginapatuman makaron sa nasyong Thailand kasunod it padayun nga pagtaas it kaso it covid 19 tuga it mas makamaeatay ag makataeapon nga delta variant.
Suno kay Bombo International Correspondent Michael Garulacan, sangka teacher sa Thailand nga apektado man ro mga pinoy nga naga-istar ag nagatrabaho sa nasambit nga nasyon eabi eon ro mga naga-istar sa lugar nga ginpaidaeum sa red dark zones.
Umpisa ko Hulyo 12 hay nagpatuman sigon ro mga otoridad it 14-day lockdown sa nasambit nga mga lugar nga nakitaan it madasig nga pagtaas it kaso it deadly virus.
Pila sa mga lugar nga ginpaidaeum sa dark red zones hay ro Bangkok, Nakhon Pathom, Nonthaburi, Pathum Thani, ag maabu nga iba pa.
Ro mga residente sigon sa apektadong lugar hay kinahangean nga magtinir sa andang baeay umpisa alas-9 it gabi-i hasta alas-4 it aga-aga.
Sarado man ro kaabuan sa mga establisimento komersiyal nga bukon it essential ro andang baligya ag serbisyo.
Sa mayad nga swerte suno kana maskin nga online class hay may trabaho sanda nga mga titser bukon it kapareho it ibang pinoy idtu nga nagatrabaho sa mga hotel ag restaurants nga owa guid it income rason nga kanya-kanya it diskarte eon lang.
Mandatory man sigon ro facemasks sa mga pampublikong lugar.
Ro nationwide state of emergency hay magapabilin hasta sa Hulyo 31.
Sa pihak nga parte, gindugang pa ni Garulacan nga masyado eon nga gaoy ro mga health care workers sa Thailand bangud sa padayun nga pagtaas it kaso.
Prayoridad sigon it gobyerno nga bakunahan ro andang mga pumueuyu ag second priority eamang ro mga dumueuong nga nagatrabaho sa nasyon kapareho nanda nga mga pinoy.
May nagakalhit man nga balita nga agud nga indi maapektuhan ro andang travel economy hay gintago nanda ro matuod nga kaso it covid 19 sa Thailand ko nagtaliwan nga dag-on.
