Manami nga balita bangud may pagadangopan dugang eon ro mga indibidwal nga may ginapangatubang nga mabug-at nga problema ukon depression nga masapwan sa banwa it Kalibo.
Tinutuyo kara nga makapabutyag sa publiko nga may lugar ag mga tawo nga haom pirmeng magpamati sa anumang ginapangatubang nandang problema sa kabuhi.
Ginpahayag ni Myryl Labor Radones nga pormal nandang ginbuksan sa publiko ko Mayo 10 ro Thanks God its Wednesday ukon TGIW nga nahamtang sa may Aklan Inter Faith Academy.
Raya sigon hay bukas para sa tanan apisar kun anuman ro relihiyon nga gustong magpabutyag ukon may maistoryahan sa andang problema ag ro mga naga kinahang-ean it mga pangamuyo
Ro nasambit nga lugar hay may mga tawo nga haum magpamati sa mga gustong may ipakigbahin nga problema ag magpangayo it nagakaigong laygay may kaangtanan sa andang ginapangatubang.
Suno pa kay Radones, umpisa kat nagbukas sanda sa publiko hay masobra sa 100 eon ro nagdangop sa andang taeatapan nga may mga mabug-at nga problema ag nagapangayo it pagpangamuyo.
Ginakalipay sigon nanda nga makapaabot it bulig pamaagi sa pagtao it laygay ag pagpamati sa sangka tawo bangud sa mabahoe ro bulig kara sa mga raya.
Simpleng pagpamati eamang sigon apang may posibilidad nga makaeowas it sangka kabuhi.
Angot kara, ro Thanks God It’s Wednesday hay bukas kada Miyerkules ag may nagahueat nga libreng tinapay, kape ag laygay sa tagsa ka indibidwal.
Sa pihak nga parte, ro konsepto hay mabahoe nga bulig eabi eon ag nagasinaka makaron ro numero it mga indibidwal sa bilog nga probinsya it Aklan nga gina-utas ro kaugalingon nga kabuhi bangud sa depression ukon may mga grabeng problema.