Kalibo Aklan —- Kalmado eon ro sitwasyon sa The Hague, Netherlands tuga it 2019 coronavirus disease (COVID-19).
Suno kay Bombo International Correspondent Sherlyn Redecio, tubong Brgy. Pagsanghan, Banga apang presenteng naga-istar sa nasambitang nasyon nga makaron hay naduea eon ro bansag kanda nga ghost town kamana man, nakontrol eon ro libo-libo adlaw-adlaw nga nagakamatay bangud sa COVID-19.
Suno pa kana, uwa it naimbento nga bueong sa nasambitang nasyon apang maabo man ro nagmayad sa sakit ag nakontrol eon ro pagkalhit it virus bangud nga istriktong ginapatuman it gobyerno ro polisiya kaparehas eon lang sa pagpabilin sa tagsa nanda ka panimaeay ag sundon ro social distancing.
Ko nagtaliwan nga mga dinominggo suno kana hay uwa sanda it kinaeain sa nasyon nga Italy bangud nga punuan ro mga ospital, ro iba hay nagakamatay eon lang nga uwa nasueod sa ospital samtang ro iba hay inoras gidlang ro ginahuyap sa andang kabuhi ag nagakamatay eon.
Sa makaron suno kana hay inde eon kaabot it 50 ro nagakamatay kada adlaw bangud nga nakontrol eon ro pagkalhit it virus.
Samtang, ro mga empleyado nga nagsueod sa trabaho sa kasagsagan it pandemya hay makabaton it 90 porsyento nga dugang sa andang sweldo halin sa gobyerno.
