KALIBO, Aklan —Ginaduso makaron it Department of Environment and Natural Resources (DENR) ro pag-angkon it thematic approach sa nagapadayon nga rehabilitasyon sa isla it Boracay.
Suno kay DENR-6 Regional Director Franciso Milla Jr. importante nga matutukan ro ap-at nga nagapangunang thematic areas agud masiguro ro maayos ag epektibong pagpatuman it mga laye ag regulasyon, pagbawas sa polusyon, pagbawi ag rehabilitasyon it ecosystem ag imprastraktura.
Dugang pa kara nga halin sa dating Boracay Inter-Agency Task Force, pagatawgon eon raya nga Boracay Inter-Agency Rehabilitation Management Group nga pagadumaeahan it bag-ong gintukod nga Boracay Action Plan.
Raya sigon hay pagapangunahan ni DENR Assistant Regional Director Livino Duran.
Samtang, naga-eaum ro DENR sa padayon nga kooperasyon it mga negosyante ag residente sa ginahimong rehabilitasyon it gobyerno sa Boracay nga an-om nga bueang ginpasarado sa publiko.
