Ginkuwestyon ni Senator Christopher “Bong” Go ro “timing” it pagpa-aresto it korte kay Vice President Sara Duterte tuga it ginapangatubang nga kasong grave threats, nga may kaangtanan sa gina-alegar nga pagpamaeag ni VP Sara sa kabuhi ni Pangueong Ferdinand Marcos Jr., First Lady Liza Araneta Marcos ag dating House Speaker Martin Romualdez.
Suno kay Go, nga kilaeang maeapit sa mga Duterte, naisip nana ro pagpa-aresto sa bise presidente bangud sa ongoing nga impeachment trial it Senado kara kun sa siin sambilog sa impeachment cases ro gina-alegar nga pagpamaeag it bise presidente sa kabuhi it pangueo ag sa anang pamilya.
Ginpunto pa nana nga ham-an nga bag-o eamang ginpasaka ro kaso sa pihak nga ko 2024 pa raya ukon haeos daywang dag-on eon ro nagtaliwan ro ginasugid nga pagpamaeag it bise presidente.
Kat kutan-on ro senador kun raya hay pagpamigos sa bise presidente, ginpahayag ni Go nga sa korte eon raya ag may legal team man ro bise presidente.
Samtang, kat boe-an it reaksyon si Senator Joel Villanueva angot sa pagpa-aresto kay VP Duterte, ginpahayag nana nga owa imaw it P30,000 nga pangbayad it multa rason nga owa imaw it komento angot kara.
Madumduman nga sa idaeum it sub judice rule hay bawae ro mga senator judges, mga abogado it prosekusyon ag depensa ag maskin ro akusado nga magkomento sa merito it kaso.
