KALIBO, Aklan—Ginbida sa ginpatigayon nga Tinda Turismo ag Savor Malay ro mga lokal nga produkto ag manami nga mga pagkaon it banwa it Malay kadungan sa andang 74th Malay day celebration.
Ro event hay nag-umpisa kahapon nga adlaw it Miyerkules ag magatapos makaron nga adlaw Hunyo 15.
Suno kay Malay Tourism Office head Felix delos Santos nga naging madinaeag-on ro event nga gin-organisa it lokal nga gobyerno it Malay sa pakikipagbueuligan it Department of Tourism matapos nga maabu nga mga negosyante ro nagpasakop ag gindagsa it mga tawo.
Raya hay ginpasakupan it 17 nga barangay it Malay eakip ro Ati community.
Tuyo sigon kara nga mas pang mapa-umwad ro mga lokal nga produkto ag makilaea sa iba pang mga lugar.
Mag-eowas kara, gusto man nanda nga i-showcase ro nagkaeain-eain nga authentic food it banwa.
Ro mga pagkaon sa Savor Malay hay ginpahaum it mga tumanok nga mga kusinero ag iba pang food establishments sa Malay.
Naging highlight man sa selebrasyon ro pagtau it pagkilaea sa mga nagapangunang taxpayers it malay ag isla it Boracay.
Ginpasidunggan man ro mga young achievers it banwa eabi eon ro mga nakabaton it latin honors makaron nga school year.
Ro malay day hay ro dag-unan nga selebrasyon agud nga dumdumon ro pormal nga pagseparar it banwa it Malay sa banwa it Buruanga kada Hunyo 15.
Ro selebrasyon kada dag-on hay ginapahauman it nagkaeain-eain nga mga activities kapareho it paraw regatta ag grand binayle.
