KALIBO, Aklan—Madinaeag-on nga nagtapos ro ‘Tinda Turismo’ it lokal nga gobyerno it Kalibo sa Pook Jetty Port nga nag-umpisa ko Setyembre 15 ag nagtapos ko Setyember 29 bilang kaparte it pagbuylog sa selebrasyon it Tourism Month.
Bangud kara, ginpahayag ni sangguniang bayan member Ronald Marte nga bilang chairman it committee on tourism nga plano nana nga mag-usoy it lugar sa nasambit nga jetty port nga mabutangan it mga stalls agud nga makapadayun sa pag-negosyo ro mga maintok nga mga negosyante nga nagpasakop sa nasambit nga event kamana man mataw-an it kahigayunan ro mga pumueuyu nga ma-enjoy ro ambiance it dagat ag pagbantay sa manami nga view it sunset ag sunrise kaibahan ro andang mga mahae sa kabuhi.
Nasayuran nga pilang mga micro, small and medium enterprises nga nagpasakop sa tinda turismo ro nagpahayag sigon it interes nga mapadayun ro andang naumpisahan nga negosyo nga may kaangtanan sa agrikultura ag turismo.
Ro nasambit nga plano hay igaplastar kay Aklan governor Joen Miraflores, Kalibo mayor Juris Sucro, ag sa pamunuan it Pueblo de Panay Corporation.
