KALIBO, Aklan — Naging matawhay ag madinaeag-on ro ginpatigayon nga concert it sikat nga singer/songwriter nga si TJ Monterde, gabi-i it Biyernes, Abril 25 para sa Akeanon Night nga kaparte it selebrasyon it 69th founding anniversary it Aklan.
Suno kay P/MSgt. Jane Vega, tagapaghambae it Aklan Police Provincial Office (APPO) nga raya hay matapos ro ginpatuman nga hugut nga seguridad it mga kapulisan sa Aklan Sports Complex sa Calangcang, Makato, kun sa siin ginpatigayon ro concert.
Owa suno kana it may nailistang insidente it kinagamo sa sueod ag guwa it sports complex samtang naga-perform ag sa pagtapos it concert ni Monterde nga nagpasikat it mga kantang Palagi, Walong Bilyon, Sariling Mundo ag iba pa.
Ginaboeobanta sigon nga naga-abot sa 25,000 ro nagtambong sa ginpatigayon nga concert mag-eowas sa iba pang mga fans sa guwa it venue.
Ro nasambit nga numero suno kana hay manaba kumpara sa dumagsa nga mga concert goers ko nagtaliwan nga dag-on sa nasambit man nga venue.
Sa pihak nga parte, naga-abot sa 314 nga mga pulis ro gindeploy it APPO sa lugar mag-eowas sa mga force multipliers ag medical team.
