KALIBO, Aklan — Nagapabilin nga prayoridad nga programa it kapulisan sa Aklan ro “Tokhang Kontra Ginadumilian nga Pusil” ukon TKGP.
Suno kay P/Major Bernard Ufano, hepe it Provincial Intelligence Branch ukon PIB-Aklan nga nalipay imaw bangud sa maabu nga mga pumueuyu ro nag-surender it andang mga armas sa nagkaeain-eain nga police station sa probinsiya bilang ‘safekeeping’ samtang gina-proseso pa it mga nagapanag-iya it nasambit nga baril ro andang dokumento para sa legal nga pag-posesyon ag pagpanag-iya kara .
Ginpahayag dugang nga masobra sa 100 nga mga armas nga owa it lisensiya ukon expired ro mga lisensya ro gin-surrender sa kapulisan sa probinsya base sa rekord it Aklan Police Provincial Office ukon APPO.
Bangud kara, nagnaba sigon ro kaso it shooting incident sa probinsiya.
Ro Tokhang Kontra Ginadumili-an nga Pusil hay inisyatibo it Police Regional Office ukon PRO – 6 agud eubos nga mapabakod ro kampanya kontra sa kriminalidad sa rehiyon eabi eon ro pag-abu it owa it lisensiya ukon expired ro lisensya it mga armas ag mapanaba ro krimen nga nagagamit it bukon it lisensyado nga baril.
