KALIBO, Aklan—Eubos nga kalipay ro nabatyagan it sangka Aklanon nga nag-top 3 sa Veterinarian Licensure Examination ko Setyembre 2022.
Si Dr. Kent Vicente hay tumandok it banwa it Altavas ag nagtapos sa Aklan State University (ASU) Banga main campus ko 2021 sa kursong Bachelor of Science in Veterinary Medicine.
Owa sigon nana ginaeauman nga makapasar ag mag-top sa board examination.
Naging worth it sigon tanan ro anang sakripisyo sa sueod it an-om nga dag-on nga pagtuon sa kolehiyo.
Ko una suno kana hay bukon imaw it sigurado nga makapasar bangud masyadong malisod ro exam.
Una sigon imaw nga nakabaton it mensahe angot sa anang pagpasar sa anang magueang nga babaye ag pagkatapos hay gin-adtunan imaw it anang ama sa anang gina-tiniran kung siin dikara nana nasayuran nga top 3 imaw.
Makabig suno kana nga overwhelming ro hitabo bukon eamang it sa anang kaugalingon kundi sa bilog nga pamilya.
Sa makaron hay owa pa it kongkretong plano si Dr. Vicente kung ano ro anang masunod nga paga-ubrahon.
Gusto anay sigon nana nga mag-relax ag magpahuway antes maghimo it desisyon.
