KALIBO, Aklan—Eubus ro pagpasaeamat it sangka manugturo maghalin sa banwa it Ibajay matapos nga nag top 6 sa 2018 Principal Examination anchored in the National Competency-Based Standards for School Heads (NCBSSH).
Si Arlene Moises Senatin hay sambilog sa tatlong manugturo it Department of Education (DepEd)-Aklan nga nakapasa sa Principals Test 2018.
Suno kana, bukon eamang it raya ro unang beses nana nga paghana nga pagbueo it nasambitang eksaminasyon kundi raya eon ro pang-ap-at nga kahigayunan matapos nga maabong sab-eag sa anang ikaayong eawas.
Apang sa pihak kara, eubus ro anang kalipay bangud nga naangkon eon nana makaron ro sambilog sa anang handom nga maging principal sa kabilugan it anang career bilang manugturo.
Ko una suno kana hay inde pa imaw magpati nga nakapasa sa principals test bangud sa bukon man it hangae ro anang naagyan hasta nga naabot ro anang handom sa kabuhi.
Apang ko ulihi sigon hay naabsorb eon nana ro kadaeag-an pinaagi man sa pagpaabot it mga mensahe ko anang mga co-teachers ag mismong pamilya kara.
Nasayuran nga si Senatin hay presenteng nagaturo sa Mabusao Elementary School.
Imaw hay nakasueod man sa top 10 it 2004 Licensure Examination for Teachers ag makaron hay top 6 sa kabilugang 148 passers halin sa 23,780 nga examinees sa bilog nga nasyon.
