KALIBO, Aklan — Matapos ro haeos 12 anyos nga pagpanago sa kasuguan, arestado ro top 7 most wanted personality it banwa it Banga sa ginpatigayon nga operasyon sa A. Bonifacio St., Blumentrit, Manila, bandang alas-6:30, Lunes it agahon.
Ro akusadong si Arnold Reposar Romaquin, 38, sangka electrician ag tumandok it Brgy. Cupang, Banga hay gin-aresto sa gahum it warrant of arrest nga ginpaguwa ni Presiding Judge Elmo F. Del Rosario it RTC 6, Branch 5 Kalibo, Aklan nga may petsang Marso 1, 2007.
Si Romaquin hay may kasong frustrated homicide.
Sangka impormante ro ginasugid nga nagtimbre sa mga otoridad angot sa ginakahimtangan ni Romaquin rason nga ginkasa ro operasyon pinaagi sa gintingub nga pwersa it Aklan PPO Trackers Team, Banga Municipal Police Station, Southern CIDG, 605th MARPSTA ag PIS.
Kapin sa P24,000 ro gintaeana nga piyansa it korte para sa anang temporaryong kahilwayan .
Ro akusado hay nakataeanang igaturn-over sa natungdan nga korte para sa nagakaigo nga disposisyon .
