Nag-umpisa eon ro Top Level Management Conference (TLMC) it Bombo Radyo Philippines, the No. 1 radio network in the country sa Iloilo City, ro ginakabig nga “seat of government” it network.
Ginpangunahan it chairman emeritus it Bombo Radyo Philippines nga si Dr. Rogelio M. Florete ro aktibidad nga may temang “Digital Bombo Radyo Experience.”
Ro media mogul nga pilang dekadang nagadumaea sa Bombo Radyo Philippines hay nauna eon nga ginpasa ro “baton” sa anang onga nga si Ms. Margaret Ruth C. Florete bilang President ag Chief Executive Officer, agud masiguro sa mga tagapaeamati nga igapadayon ro kultura it Bombo Radyo nga pagta-o it balita “first, fast and right.”
Magata-o it anang “State of the Network Address (SONA)” si Ms. Florete sa mga plano pa it Network sa ginapangatubang, kamana man ana nga pagatalakayon ro pagpasanyog pa sa serbisyo kaparehas eon lang sa mga pwedeng mapamatiang mga paboritong Bombo Radyo ag Star FM stations programs sa cellphones via Bombo Mobile App, apisar nga una sa guwa it baeay ukon bisan siin nga bahin it kalibutan.
Kaeakip pa sa pagatalakayon sa serbisyo publiko mag-eowas sa pagta-o it balita ag impormasyon hay sa linyada it mga socio-cultural projects nga nagata-o it impact sa kabuhi it mga Pilipino.
Ro TLMC it Bombo Radyo Philippines hay ro dag-unang “ritwal” nga ginatambungan it mga senior officers, area ag mga station managers halin sa 31 Bombo Radyo ag Star FM Stations halin sa 24 nga mga key cities nationwide.
Ro TLMC makaron nga dag-on hay pagasug-aeawon it sambilog pang pinanaming cultural project it Bombo Radyo Philippines, ro Bombo Music Festival 2019 kon siin magapasiklaban ro 12 mga finalists sa live performance sa maabot nga Sabado, Enero 12, 2019 sa Rose Memorial Auditorium sa Central Philippine University.
Ro 30-piece Bombo Symphony Orchestra sa idaeom it baton ni Maestro Gerardo Vicente Muyuela hay makipagbahin it kakaibang musical experience ag magata-o it kolor sa musical talents nga naghalin pa sa nagkaeain-eain nga bahin it nasyon.
Bilang sangka nationwide project, katuyuan it Bombo Music Festival nga maging kaparte sa paghasa it ginaangkon nga kaaeam it mga Pinoy sa linyada it musika ag kultura.
Mga bigatin ro uman nga kaeakip sa magiging hurado makaron nga dag-on nga ginakaeakipan nanday Maestro Ryan Cayabyab nga una eon nga nakilaea bilang national artist sa musika; Jim Paredes, halin sa iconic group nga APO Hiking Society; Father Jun Borres, sangka Jesuit musician; Isabelle de Leon, singer actress ag ro dating lead singer it Rivermaya nga si Jason Ferandez.
