KALIBO, Aklan—Ginpaathag ni Malay Acting Mayor Frolibar Bautista nga mabuhay eon ro programa kaangot sa pag phase-out it de-gasolinang tricycle sa isla it Boracay.
Pinaagi sa Memorandum Order No. 2019-091, ana nga ginmanduan ro Municipal Transportation Office nga i-implementar eon ro total phase out sa tradisyunal nga tricycle sa isla halin ko Nobyembre 19 hasta it Disyembre 31 it presenteng dag-on.
Ginpahayag dugang nga sandig raya sa katuyuan it gobyerno nga maging environment-friendly ro transportasyon sa sikat nga isla.
Tyempo eon suno kana nga ro mga Electronic tricycle ukon E-trike eon ro magabyahe sa Boracay.
Una kara, ko 2018 hay nagpaguwa ro Office of the Municipal Mayor it Executive Order No. 007 kon sa siin ginmanduan ro Municipal Transportation Office nga sanda ro magapanguna sa istriktong implementasyon it e-trike availment ag distribution.
Sa makaron hay masobra sa 500 franchise E-trike eon ro nagabyahe sa bilog nga isla.//
