KALIBO, Aklan—Nagsaka sa 26,611 ro numero it tourism-dependent workers nga apektado sa isla it Boracay kasunod it nagapadayon nga epekto it pandemya daea it Coronavirus Disease ukon Covid-19.
Suno sa Boracay Philippine Chamber of Commerce and Industry, maskin nga ginhaeogaan it uman ro borders sa mga kaeapit probinsya hay bukon gihapon raya it garantiya nga mabuhi it amat-amat ro turismo sa isla.
Raya hay kasunod it kabaeaka it mga local nga turista bangud nga uwa pa it istable nga covid testing facility ro Aklan.
Sa pinakaulihing datos, nakalista ro Malay Municipal Tourism Office it 83 nga turista nga nagbisita sa isla halin ko June 15 hasta it 30,2020.
May kaangtanan kara, naga-apela sigon ro lokal nga gobyerno it Malay nga mas pang haeogaan ro restrictions partikular ro pagbawi sa age limit para sa mga turista bangud nga inde man makabakasyon ro mga ginikanan kon inde madaea ro andang mga onga.
Ro nasambit nga hinyo sigon hay nairekomenda eon it tourism department sa Inter-Agency Task Force for the Management of Emerging Infectious Diseases (IATF-EID).
Nasayuran nga ro Aklan hay nagapabilin sa modified general community quarantine hasta sa Hulyo 30,2020.
