KALIBO, Aklan—Plano it provincial government nga taw-an man it prayoridad ro mga tourism workers sa Isla it Boracay engkaso nga mag-abot eon ro bakuna kontra COVID-19.
Ginpaathag ni Aklan Governor Florencio Miraflores nga bangud nga nakadepende ro pangabuhian it probinsiya sa industriya it turismo rason nga kinahangean nga masigurong mabaskog ag healthy ro mga nagatrabaho kara.
Importante suno kana nga makaangkon it full vaccination program sa isla agud nga masigurong eowas ro mga bisita ag trabahador sa oras nga eubusan eon nga mabuksan ro isla sa mga dumueuong nga turista.
Kaibahan pa sa andang prayoridad nga mataw-an it bakuna hay ro 70 porsiyento it populasyon it probinsiya ukon 420,000 nga residente kaibahan eon ro mga health care ag medical workers, pigadong pamilya, mga senior citizens, miyembro it Pantawid Pamilyang Pilipino Program ag mga uniformed personnel.
Angot kara, ginpahayag ni Governor Miraflores nga nakipagkasugot eon sanda sa pharmaceutical company nga AstraZeneca para sa pagbakae it bakuna.
Kapin sa P200 million pesos ro gintaeana nga pondo para sa mass vaccination nga paga-utangon halin sa banko.
