KALIBO, Aklan—Amat-amat eon nga nagataas ro tourist arrival sa isla it Boracay umpisa nga ginbuksan raya ko Oktubre 1.
Suno kay Malay mayor Frolibar Bautista nga umpisa Oktubre 1 hasta 17 it makaron nga dag-on hay nag-abot eon sa 931 ro numero it mga bakasyunista.
Mabahoe sigon ro naibulig kara sa sangkiri nga paghaeuga it National Inter-Agency Task Force sa COVID-19 testing requirements nga halin sa dating 48 oras hay ginhimo nga 72 oras.
Angot kara, kumpiyansa ro alkalde nga mas pa nga madugangan ro nasambit nga numero sa oras nga pasugtan pa it IATF ro hinyu it provincial government nga i-exempt ro mga taga-western visayas sa ginapangayo nga negatibong resulta it swab test bangud nga owa man it travel restrictions nga ginapatuman ro “One Panay”.
Mag-eowas sa mga akeanon ag mga turistang halin sa Western Visayas, nadugangan man ro mga turistang taga-National Capital Region ukon NCR.
Sa pihak nga parte, ginpahayag pa ni Mayor Bautista nga nagahueat pa sanda it “go signal” kon hin-uno uman nga pagapasugtan ro pagpatigayon it beach volleyball ag iba pa sa isla.
