KALIBO, Aklan–Dismayado ro Municipal Tourism Office it lokal nga gobyerno it Malay sa gulping pagbagsak it tourist arrival sa isla it Boracay kasunod it pag-instrikto sa NCR plus bubble.
Suno kay Felix delos Santos Jr., Malay Municipal Tourism Officer nga umpisa kahapon, Marso 22 hay haeos 228 eon lang ro nakasueod nga bisita.
Maabu suno kana ro nakansela nga bookings it mga turista kahapon it hapon nga magabiyahe sa Boracay matapos nga ginbaeabagan it Civil Aeronautics Board ro tanan nga mga leisure flights sandig sa mandu it Department of Transportation.
Ginpamilit pa kara nga ko marso 19 nag-abot eon kunta sa 1,056 ro numero it mga turistang nagbisita sa isla it Boracay sa unang adlaw nga ginpasugtan eon ro paggamit it saliva RT-PCR test.
Matsa imposible eon sigon nanda nga maabot ro target nga 20,000 nga tourist arrival makaron nga buean it marso bangud sa NCR plus bubble.
Nasayuran nga ro mga turistang halin sa National Capital Region (NCR) ro nagapangunang bisita sa Boracay.
Bangud kara, ginpahayag ni Delos Santos nga ginatutukan nanda makaron ro mga turistang magahalin sa aklan ag kaiping nga probinsiya sa Western Visayas agud nga maskin paalin hay makabawi ro industriya it turismo.
