KALIBO, Aklan—Ginaeauman nga sa Pebrero 15 hay pagaboe-on eon ni acting Malay Mayor Frolibar Bautista ro travel ban sa tanan nga mga magabisita sa isla it Boracay nga may travel history sa China, Macau ag Hong Kong.
Madumduman nga nagpaguwa it Executive Order No. 004 series of 2020 si Mayor Bautista ko Pebrero 6 nga nagabawae nga makasueod sa isla ro mga indibidwal nga nakabiyahe sa China kaibahan ro anang special administrative regions sa sueod it 14 diyas.
Suno kana nga paga-estudyuhan pa nana ro ginpaguwa nga mandu bangud nga gindugang it gobyerno ko nagtaliwan nga adlaw ro Taiwan sa mga may travel restrictions.
Umpisa ko Pebrero 7 hay hugut nga ginabantayan ro tatlong border checkpoints sa nasambit nga banwa agud nga matumod ro mga tawo nga posibleng may sintomas it coronavirus gamit ro handheld thermometers.
Required man ro mga biyahero nga mag-pakita it pasaporte para sa verification.
Apang sa oras nga ma-lift ro travel restrictions sa banwa hay pagakakason man ro mga checkpoints ag igapatuman eon ro executive order ni Aklan Governor Florencio Miraflores nga kon sa siin, gina-obligar ro tanan nga mga turista, local man ukon dumueuong nga naga-agi sa mga paeuparan ag pantalan sa Aklan nga makaangkon it health declaration cards antes nga makasueod sa probinsiya.
Nasayuran nga sa makaron hay haeos 40 % eon ro naduea sa tourist arrival sa isla.
