KALIBO, Aklan—Sangkiri nga nagtaas ro numero it mga turistang nagadayo sa isla it Boracay matapos haeugaan it gobyerno ro quarantine restrictions sa Metro Manila ag kaiping nga mga probinsiya.
Base sa listahan it Malay Tourism Office, naga-abot sa 2,905 ro tourist arrivals umpisa Hunyo 1 hasta 6, 2021.
Kaabuan kara hay taga-National Capital Region (NCR) nga may kabilugan nga ,760.
Raya hay ginsundan it Calabarzon nga may 552 ag Central Luzon nga 230.
Suno kay Felix delos Santos, chief tourism operations officer, nagaeaum ro andang opisina nga maga-dere-deretso eon ro pagtaas it tourist arrivals agud nga makabangon ro industriya it turismo sa Boracay.
Ginpahayag dugang nga mas pang ginpabaskog it lokal nga gobyerno it Malay ro pagpatuman it health and safety protocols.
Samtang, nagpaandam man ro mga otoridad sa mga turista nga likawan ro paggamit it mga pekeng RT-PCR test results agud nga indi maunsiyami ro masadya kunta nga bakasyon ag indi makasuhan.
Ginpahayag dugang nga dapat guid nga sundon ro ginapatuman nga guidelines it LGU Malay.
Antes suno kana nga magpaligos hay kinahangean nga magsueat sa logbook.
Nagapabilin nga 11 suno kana ro andang designated swimming areas sa isla.
Bawae man gihapon suno kana ro mga resto bars ag mga restaurants eamang ro bukas.
Sa station 1 ro gintaeana para sa mga sea sports activities.
Samtang, ginpahayag dugang nga naga average sa 5 hasta 8 nga eroplano ro naga tugpa sa caticlan airport halin sa Metro Manila.
