Sangkiring nagnaba ro tourist arrival sa Isla it Boracay ku buean it Agosto.
Suno kay Kathrine Licerio, administrative officer it Malay-Boracay Tourism Office, may kabilugan nga 160,160 ro tourist arrival sa buean it Agosto kun sa siin 4% rayang mas manaba kumpara sa kaparehong tyempo ku nagtaliwan nga dag-on.
Sa nasambit nga numero, 19,088 kara ro foreign tourist, 138,945 ro domestic, ag 2,127 ro overseas Filipino workers ukon OFWs.
Raya eon sigon ro pangatlong buean nga nakalista it negatibong tourist arrival ro isla tuga man it pag-umpisa it tag-uean, pag-balik eskwela it mga estudyante, ag padayon nga pagnaba it foreign tourist.
Padayon sa gihapon sigon ro andang pagpanikasog ag pag-himo it mga tikang para nga maka-recover ro isla sa pagnaba it mga naga-bisita sa isla.
Paathag ni Licerio nga mageuwas sa pagpartisipar sa mga exposé ag iba pang aktibidad para nga ma-promote ro isla, ginapahauman man nana ro mga tourism activities nga ginaeauman nga maka-engganyo sa mga dumueuong ag mga bisita.
