KALIBO, Aklan — Owa naapektuhan ro tourist arrivals sa isla it Boracay sa kontrobersiyal nga paeag ni Pangueong Rodrigo Duterte nga igapasarado ro isla kon hindi raya malimpyuhan bangud sa problema sa basura ag mga establisimentong iligal nga nakakonekta sa drainage system.
Suno kay Caticlan Jetty Port Administrator Niven Maquirang, sa kamatuoran hay nagtaas pa ro numero it mga turistang nagabakasyon sa isla umpisa ko Pebrero 10 hasta 12 kumpara ko nagtaliwan nga dag-on.
Base sa andang record, owa sigon naganaba sa masobra sa 7,000 ro nagasueod nga turista kada adlaw.
Apang, sangkiri raya nga nagnaba ag nag-abot eamang sa 5,200 ro mga turista ko Pebrero 13 bangud sa pagpanaeasa it bagyong Basyang.
Ginpahayag pa kara nga umpisa makaron nga adlaw it Biyernes, Pebrero 16 sa selebrasyon it Chinese New Year hay pagasayuron nanda kon may epekto sa tourist arrivals ro nagtuhaw nga isyu bangud sa mga napabalitang kanselasyon it bookings sa pilang mabahoe nga hotels ag resorts.
Nagaeaum man si Maquirang nga maayos eagi ro problema bangud nga nagahilapit eon ro tag-init ag bakasyon kun sa siin hay mabaskog ro turismo ag negosyo sa Boracay.
