KALIBO, AKLAN — Gin kumpirma ni Department of Tourism (DoT) Boracay field office head Kristoffer Leo Vellete nga bukon it apektado ro tourist arrivals it kontrobersyal nga eumot sa baybayon it Boracay makaron nga summer season.
Pamatuod sigon hay ro padayun nga pagtaas it numero it mga turistang nagabakasyon sa isla sa unang daywang buean it makaron nga dag-un.
Gin duea kara ro pagkabaeaka it mga tawo may kaangtanan sa naggowang eumot bangud natural phenomenon sigon raya nga masaming nagagowa kada Pebrero hasta it Mayo kada dag-un.
Gin pamilit pa ni Vellete nga naga katabo eon raya bago pa nadiskubre ro isla bilang sangka tourist destination.
Sa ginpatigayung scientific study nga gin bo-oe it Boracay Foundation Inc. (BFI), ro eumot ukon green algae hay sambilog sigon sa mga dahilan kun ham-an pino ag maputi ro baeas sa Boracay.
Gina balanse sigon it mga eumot ro sobrang nutrients sa tubi ag kun paga dueaon raya hay magatuga it ecosystem imbalance.
Nasayuran nga ro isyu hay nakaabot eon kay Department of Environment and Natural Resources (DENR) Sec. Gina Lopez.
