KALIBO, Aklan—Amat-amat eon nga nagataas ro tourist arrivals sa isla it Boracay.
Suno kay Malay Municipal Tourism Officer Felix Delos Santos nga nag-abot sa 12,432 ro mga turista nga nagbakasyon sa isla umpisa Pebrero 1 hasta 23, 2021 base sa andang ginapaguwa nga monthly report.
Suno kana nga umpisa disyembre it nagtaliwan nga dag-on hay naga-average sanda sa 500 nga turista kada adlaw.
Makaron nga buean it Pebrero hay mas pang nagtaas ro andang arrivals bangud sa mga long weekend, Chinese New Year ag Valentine’s day ag ginatantiya nga magalobo pa sa haeos 13,000 hasta 14,000 sa pagtapos it makaron nga buean.
Raya hay kapareho man it natabu ko buean it Disyembre it nagtaliwan nga dag-on nga nag-abot sa 15,000 ro mga bisita ag ko buean it Enero hay umabot sa haeos 11,000 ro nailistang bakasyunista.
Ginpahayag dugang nga ro mga taga National Capital Region ukon NCR ro top source it mga turista nga naga-abot sa haeos 70 porsiyento nga ginsundan it Iloilo ag Aklan.
Nagapabilin nga owa it age restrictions ro pagbisita sa Boracay, apang hugut sa gihapon nga ginapatuman ro health and safety protocols kontra sa covid 19.
Angot kara, ginpahayag pa ni Delos Santos nga nagdugang pa ro hotel establishments nga gintaw-an it certificate to operate it DOT nga nag-abot sa 203 nga may kwarto nga 4,728.
