KALIBO, Aklan–Naga-abot eon sa 1,531,774 ro mga turista nga nagbisita sa isla it Boracay umpisa Enero hasta Nobyembre 25, 2022.
Bangud kara, ginpahayag ni Rex Aguirre, Tourism Officer Head of the Culture and the Arts and Special Events Division it LGU-Malay nga ginaeauman nga maabot nanda ro target nga 2 million ukon masobra pa nga tourist arrival sa pagtapos it makaron nga dag-on.
Sa nasambit nga numero, 97,061 ro foreigner, 1,403,041 ro domestic ag 31,672 ro mga Overseas Filipino Workers.
Bangud nga sangka family tourist destination ro boracay, nagapati sanda nga madugangan pa ro numero it mga bakasyunista makaron nga disyembre sa tiempo it paskwa ag bag-ong dag-on.
Ginpahayag dugang nga operational eon ro biyahe it Royal Air sa Caticlan airport nga may rotang Manila-Caticlan ag Cebu-Caticlan.
Mag-eowas kara ro pagbalik it direct flights halin sa Taiwan.
Samtang, ginapahauman man makaron it LGU-Malay ro uman nga pagpatigayon it ati-atihan festival sa boracay sa enero 7 hasta 8 pagkatapos it haeos daywang dag-on nga owa pagpasundayag it mga grupo ag tribu it mga nagkaeain-eain nga mga stakeholders ag tumandok it isla.
Posible man suno kana nga makaangkon it fluvial parade.
Makabig sigon raya nga tourist attraction nga makahakot it maabu nga mga turista.
