KALIBO, Aklan – – – Nagtaas it 6% ro tourist arrivals sa isla it Boracay para sa buean it Marso it presenteng dag-on.
Suno kay Caticlan Jetty Port Administrator Nieven Maquirang, nakalista it 177,087 tourist arrivals sa nasambitang buean, mas mataas kon ikumpara sa 167,445 nga nailista sa magkaparehong period it nagtaliwan nga dag-on.
Nasayuran nga 50 porsiento sa mga turista hay foreigners kaeakip eon ro mga sakay it nagbisita nga cruise ships.
Aminado man si Maquirang nga naging mahina ro arrivals engkasong uwa nadayon ro pagbisita it mga cruise ships.
Samtang, ginkumpirma ni Maquirang nga maabo eon ro nailistang cancellation it bookings sa mga hotels sa isla kamana man ro diversion it flights it mga airline companies.
Kasunod sigon raya it naging advise kanda it Department of Tourism (DOT) nga inde eon magbiyahe sa Kalibo ukon Boracay bangud sa ginaeaumang pagpasarado sa isla sa maabot nga Abril 26.
