KALIBO, Aklan—Ginpasiguro it Boracay Inter-agency Task Force nga uwa naeaeabag ro carrying capacity sa isla it Boracay maskin nga nagaabot sa 3,000 ro numero it mga turista nga nagasueod kada adlaw.
Sa interview it Bombo Radyo, ginpahayag ni Deputy Ground Commander Al Rulfo ginasigurado sigon nanda nga inde mag-eampas sa 6,000 ro pwedeng magsueod sa turista sa sikat nga isla.
Ginpahayag dugang nga hugot ro andang pagmonitor sa mga bookings it mga accredited hotels and resorts kon siin, nagapabilin sa 307 ro mga establisyementong ginapasugtan it Department of Tourism (DoT) nga puwedeng magbaton it accommodation.
Normal eon sigon ro “ambiance” sa isla haeos tatlong buean matapos ginbuksan raya it uman sa publiko.
Ginpahauman eon sigon nanda ro pagbuhos it foreign ag local tourist sa nagahilapit nga summer season.
