KALIBO, Aklan—Nag-abot eamang sa 1,582 nga turista ro nagbisita sa isla it Boracay umpisa Mayo 1 hasta 28.
Pinakamataas sigon nga nailistang bisita sa sueod it sang adlaw hay 161 samtang ro pinakamanaba hay 11.
Kaabuan sigon sa mga turista hay naghalin sa Western Visayas ag may pilang taga-batangas.
Suno kay Malay Municipal Tourism Officer Felix Delos Santos nga ginaeauman nanda nga mas pa nga maganaba ro numero it tourist arrivals matapos nga ginbutang makaron sa modified enhanced community quarantine ukon MECQ ro Iloilo bangud sa gulping pagtaas it kaso it covid 19.
Nagapabilin man sigon nga bawae nga makasueod sa isla ro mga bakasyunista halin sa NCR plus area ukon National Capital Region, Bulacan, Cavite, Laguna, ag Rizal.
Aminado si Delos Santos nga mabahoe nga kawad-an sa ekonomiya it Malay ro ginpatuman nga travel restrictions sa NCR plus eabi eon sa tourist arrivals sa isla apang kinahangean nga magsunod ro lokal nga gobyerno agud nga mapugngan ro pag-inabu it kaso it COVID-19.
Nagaeum sigon sanda nga sa buean it Hunyo hay boe-on eon ro travel restrictions sa NCR plus ag pasugtan eon it national inter-agency task force nga makabiyahe ro mga turista agud nga makabangon eon ro industriya it turismo sa isla.
Pila suno kana sa mga gintaw-an it department of tourism it Certificate of Authority to Operate nga mga accommodation establishments hay nagapabilin nga sarado bangud sa kawad-an it bisita.
Sa pihak nga parte, gindugang pa ni delos santos nga nakapasa eon sanda it listahan it mga tourism workers sa isla para sa nakataeanang pagbakuna kanda.
Gusto sigon it Provincial Government nga syento porsiyento it mga workers ag residente hay mabakunahan kontra COVID-19.
