KALIBO, Aklan — Ginapahauman eon it Iglesia Filipina Independiente, ukon mas kilaea sa Aglipay Church sa Brgy. Albasan, Numancia ro andang pagpatigayon it tradisyunal nga Senakulo para sa pagdumdum sa Semana Santa.
Suno kay Fr. Richard Enila, parish priest it nasambit nga simbahan nga maskin nga magastos hay ginatinguhaan nanda nga makapatigayon kara kada dag-on.
Sa makaron hay gina-preparar eon sigon nanda ro andang mga costume, sound ag ro kabayo nga pagagamiton sa nasambit nga play nga sambilog sa andang nagapangunang aktibidad para sa Huwebes ag Biyernes Santo.
Ro mga pamatan-on nga miyembro suno kana it simbahan ro nagapanguna sa andang senakulo, apang owa pa sanda naka-umpisa it practice bangud nga ro iba sa mga raya hay may mga klase pa.
Nasayuran nga kaeabanan nga ginadayo ag gina-abangan it mga pumueuyu eabi eon it mga taga-Albansan ro nasambit nga senakulo .
Sa pihak nga parte, ginpaguwa man it pamunuan it simbahan ro pilang mga schedule it mga aktibidad ag misa para sa Semana Santa.
Suno kay Fr. Enila nga maga-umpisa ro liturgical activities it simbahan sa maabot nga Domingo de Ramos ukon ro triumphant entry of Jesus sa Jerusalem.
Dere-deretso sigon ro pagahimuon nga misa hasta sa Domingo de Paskwa mag-eowas sa Lunes Santo.
Sa Martes Santo hay may pagahiwaton nga renewal of vows it mga pari nga kada dag-on man nga ginahiwat.
Bandang ala-1:00 it hapon sa Biyernes Santo hay pagahiwaton ro pagpamaeandong sa Siete Palabras ukon ulihing pitong tinaga ni Hesus.
Samtang, padumdum ni Fr. Enila nga ro Kuwaresma hay kahigayunan agud nga magpamaeandong, magpangamuyo ag magsakripisyo agud nga maeksperyensiyahan kon paalin kita nga gintubos ni Kristo sa kalibutan ag bukon it puro warang ag gadget ro pagatutukan.
