KALIBO, Aklan—May positibo ag negatibong hatud ro traditional reception rites sa kapulisan ag military.
Raya ro panan-awan ni dating Aklan Police Provincial Director ag presenteng Sangguniang Panlalawigan member sa unang distrito it probinsiya nga si Nemesio Neron.
Suno kana nga importante ro pag-angkon it disiplina it pulis ag military sa pagsueod sa serbisyo, apang kon masobrahan hay posibleng kabigon raya nga pag-eabag sa anti-hazing law.
Posible suno kana nga nabatyagan it complainant nga si Patrolman Romel Magsusi nga nakaangkon it pag abuso ro anang mga seniors ukon nasobrahan ro pagsakit kana rason nga nagreklamo raya sa national police commission ukon Napolcom.
Raya hay kasunod it pag-deploy kana sa Provincial Mobile Unit sa Buruanga.
Nauna eon nga ginkilaea ni Atty. Joseph Celis, Director it NAPOLCOM Region 6 ro mga gina-akusahan nga sanday P/Corporal Roque lurca, P/Corporal Richie lustica, Patrolman Ruel Cuales, Patrolman Ritchel Tolentino ag Patrolman Christian Solanoy.
Nagpanindugan si Atty. Celis nga ro hazing hay nagatuga it physical ag mental torture butang nga dapat maeubtan it mga una sa law enforcement agency.
Sa makaron hay presenteng gina-imbestigahan it Napolcom ro limang nasambit nga pulis.
Temporaryo sanda nga ginsaylo sa Public Safety Company sa Libacao agud nga indi maimpluwensiyahan ro ginahimo nga imbestigasyon.
