Naipadaea eon sigon sa International Criminal Court (ICC) ro transcript it pagpamati sa Senado ko adlaw it Lunes, Oktubre 28 kon sa siin nag-ako si dating Pangueong Rodrigo Duterte sa extrajudicial killings (EJK) sa war on drugs.
Raya ro ginbulgar it hayagang kritiko ni Duterte nga si dating Senator Antonio Trillanes IV sa anang X account.
Suno kana, nauna eon nga gindaea sa ICC ro transcripts it imbestigasyon it House Quad Committee ag tanan sigon hay ginbaton.
Ginpahayag dugang ni Trillanes nga tanan raya hay magamit sa kaulihanan sa trial.
Madumduman sa naging pagpamati sa Senado, gin-ako it dating presidente nga may una imaw nga death squad nga responsable sigon sa pagpatay sa mga drug suspect kat Mayor imaw it Davao City.
Samtang, ginpahayag mat-a ni Senate President Francis ‘Chiz’ Escudero nga uwa pa it nabaton ro Senado nga anumang pormal nga komunikasyon halin sa ICC angot sa imbestigasyon sa war on drugs.
