KALIBO, Aklan—Bangud sa naexperiensiyahan nga problema sa transmission grid it National Grid Corporation of the Philippines ukon NGCP rason nga nakaangkon it maeapnagon nga power interruption sa Negros ag bilog nga isla it Panay ko Huwebes, Setyembre 24.
Suno kay Michelle Visera, tagapaghambae it NGCP nga bandang alas-10:13 it agahon hay naka-monitor sanda it grid disturbance nga naka-apekto sa andang mga distribution utilities ag electric cooperatives.
Owa pa sigon natumod hasta sa makaron kon ano ro kabangdanan kara ag padayun pa nga gina-imbestigahan it andang mga tawuhan kon raya hay transmission related ukon supply related.
Kapin sa 13 suno kana nga electric cooperatives ag distribution utilities ro apektado it pagkaduea it supply it kuryente.
Ginpahayag dugang nga bangud sa mataas nga demand pagka-gabi-i hay nakaangkon eon man it power interruption sa pilang parte it aklan, antique, capiz, ag Iloilo umpisa alas-5 it hapon hasta alas-8 it gabi-i kasunod it paghinyu it NGCP nga mag-drop it pilang feeders bangud nga indi kara masarangan ro load ukon ro ginatawag nga manual load dropping.
Bangud sigon sa natabu nga maeapnagon nga system disturbance ag bangud nga bukon pa it bastante ro supply it mga power plant sa demand rason nga nakaangkon eon man it brown-out.
Samtang, gindugang pa ni visera nga ginatinguhaan nanda nga insigida nga maibalik ro power supply bangud nga maabu ro mga nagapatigayon it work from home ag mga online classes makaron nga may pandemya.
