KALIBO, Aklan—Sa tunga it mga paghana agud nga baeabagan pinaagi sa untat-biyahe ro nagahilapit nga deadline sa consolidation, nagapati ro sangka transport cooperative sa Aklan nga syento porsiyento nga madayun ro Public Utility Vehicle Modernization Program nga ginasueong it Department of Transportation.
Suno kay Edgar Igcasenza, chairman it Malinao-Lezo Transport Cooperative ukon MLTC nga owa it problema sa Aklan bangud nga haeos tanan nga mga transport groups hay nakatukod eon it kanya-kanya nga mga kooperatiba.
Ro nagapangunang sabeag sigon sa implementasyon kara hay ro kawad-an it Local Public Transport Route Plan ukon LTPRP.
Raya sigon ro magiging yabe it mga transport cooperative agud nga maka-utang sa banko nga igabakae it modernized jeepney.
Dugang pa ni Igcasenza nga gusto it mga transport groups nga indi eon ipaisoe ro konsolidasyon it mga prangkisa nga gintaeana it DOTr hasta sa Disyembre 31 agud nga magadere-deretso eon ro implementasyon it PUVMP.
May mga benepisyo suno kana nga hatud ro modernization program para sa kamaeayran it mga drivers ag kasoehayan it mga pasahero.
Ginpamilit pa kara nga owa it phase-out it tradisyunal nga jeepney ag may subsidiya halin sa gobyerno agud nga makabo-oe ro mga transport cooperatives it mga modern jeep.
Nasayuran nga sa pinaka-ulihi nga datos it DOTr ag Land Transportation Franchising and Regulatory Board ukon LTFRB, masobra sa 5,000 nga ruta nga may 135,761 consolidated franchises ro aprubado eon ag sa idaeum it operasyon it 1,838 nga mga kooperatiba.
