KALIBO, Aklan — Suportado it Caticlan Boracay Transport Multi-Purpose Cooperative (CBTMPC) ro ginaduso nga Public Utility Vehicle (PUV) Modernization Program it gobyerno.
Suno kay CBTMPC chairman Godofredo Sadiasa nga mabahoe nga kasoehayan ro maitau kara sa mga pasahero.
Kapin sa 25 nga baroto nga fiber glass ro andang igapa-obra antes nga mapaso ro andang prangkisa sa 2021.
Sa makaron, may una nga 58 nga baroto nga himo sa kahoy ag 11 nga fiber glass boats ro kooperatiba nga nagabiyahe it 24/7 nga may rotang Caticlan-Boracay ukon Tabon-Boracay.
Aminado si Sadiasa nga makaangkon it epekto sa pangabuhian ag kita it andang mga miyembro ag bangkero ro modernization plan bangud sa pag phase out it andang mga kahoy nga baroto.
Sa pihak kara, nagaeaum sigon imaw nga pagabuligan it mga banko it gobyerno agud nga maka-umpisa it uman.
Nauna kara, nag-apela ro kooperatiba ag Sangguniang Panlalawigan it Aklan sa Maritime Industry Authority (MARINA) nga indi pag gulpihon ro phase out ag himuon nga limang dag-on umpisa makaron nga 2019 hasta sa 2023.
