KALIBO, Aklan — Owa eon it tsansa nga makapasakop ro mga transport group sa probinsiya it Aklan sa ginkasa eon man nga nationwide transport strike it grupong Manibela ag Piston umpisa adlaw it Huwebes, Disyembre 14 hasta adlaw it Biyernes, Disyembre 15 .
Suno kay Edgar Igcasenza, Chairman it Malinao-Lezo Transport Cooperative ukon MLTC nga raya hay bangud nga umpisa ko 2017 hay nagtiwalag eon ro transport group halin sa eastern ag western side sa nasambit nga mga militanteng grupo.
Ginaduso nanda sa Land Transportation, Franchising and Regulatory Board ukon LTFRB nga ipaiway ro andang desisyon nga ipatuman ro Dec. 31 nga consolidation deadline.
Apang suno kay Igcasenza nga owa it rason agud nga mapaiway pa ro deadline.
Kadungan kara, ginpasiguro ni Igcasenza sa mga commuters nga owa it dapat nga ikabaeaka bangud nga regular ro biyahe it sektor it transportasyon sa Aklan.
Ginpamilit pa kara nga mabahoe nga porsiyento it mga drivers ag operators sa probinsiya hay nakasueod eon sa kooperatiba .
Dugang pa nana nga samtang owa pa nakabilog it Local Public Transport Route Plan ukon LPTRP ro provincial government it Aklan hay owa it matabu nga phase-out sa mga traditional jeepney.
Ro LPTRP suno kana ro magiging basehan it transport cooperative agud nga maka-loan sa banko para sa pagbakae it modernized jeepney.
Posible suno kana nga sa 2024 hasta 2025 hay makapaguwa eon it LPTRP ro provincial government .
